Seldi golfföt á Opna bandaríska – keppir þar sjálfur á næsta ári

Í júní stóð Andrew Bailey vaktina í sölutjaldi Opna bandaríska meistaramótsins á Shinnecock Hills, þar sem vinnuveitandi hans, golffatamerkið Holderness & Bourne, seldi vörur sínar. Næsta sumar mætir hann á Pebble Beach sem keppandi.

Bailey, sem er 34 ára og frá Cleveland, vann U.S. Mid-Amateur á Lido-vellinum á Sand Valley í Wisconsin 1. október. Í 36 holu úrslitaleik sigraði hann Nate Smith, 43 ára kylfing frá Idaho, 5/4 og lék síðustu 17 holurnar án þess að fá skolla.

Bailey lék háskólagolf með Cleveland State og stefndi á atvinnumennsku. Samkvæmt Golf Channel vann hann sér takmarkaðan keppnisrétt á kanadísku PGA-mótaröðinni vorið 2015 en lék þar aldrei. Á smærri mótaröðum hafði hann þá alls unnið sér inn um 8.000 dali. Þremur mánuðum síðar féll hann um sex metra í klettaklifri í Ohio og braut úlnliðinn svo illa að festa þurfti hann með tveimur plötum og ellefu skrúfum.

Hann sótti um að fá áhugamannaréttindin aftur árið 2016 og fékk þau ári síðar. Sjálfur segir hann slysið jafnvel hafa verið það besta sem fyrir hann kom. Á lokaárinu í háskóla hafði hann rekist á Holderness & Bourne á Facebook og haldið sambandi við fyrirtækið. Þar fékk hann síðar vinnu og er nú landssölustjóri með fjórtán sölumenn undir sér.

Í sumar hefur verið deilt um atvinnumenn sem fá áhugamannaréttindin aftur, og að minnsta kosti tveir miðlar lýstu úrslitaleiknum sem viðureign tveggja fyrrverandi atvinnumanna. Það á við um Smith, sem vann eitt mót á þremur árum á Korn Ferry-mótaröðinni og lék eitt tímabil á PGA-mótaröðinni. Bailey hefur hins vegar aldrei leikið á Korn Ferry-mótaröðinni eða PGA Tour Americas, samkvæmt gögnum PGA-mótaraðarinnar.

Bailey fór í axlaraðgerð í febrúar eftir snjóbrettaslys og lék aðeins í þremur áhugamannamótum á árinu. Á Opna bandaríska í júní laumaðist hann úr sölutjaldinu síðdegis á föstudegi til að fylgjast með hinum 17 ára Miles Russell komast í gegnum niðurskurðinn.

Eftir sigurinn fékk hann meðal annars þessi skilaboð frá samstarfsmanni: „Ótrúlegt hvað sumir leggja á sig til að sleppa við sölutjaldið“, í lauslegri þýðingu.

Bailey hefur tvisvar komið á Augusta National, í bæði skiptin sem áhorfandi.