Hlynur lék á 65 höggum og Dagbjartur sjöundi fyrir lokahringinn

Hlynur Bergsson úr GKG fékk tvo erni á öðrum hring Destination Gotland Open í dag. Þeir komu á 10. og 16. holu, sem báðar eru par 5, og með sex fuglum og þremur skollum lék hann á 65 höggum. Aðeins Oliver Lilliedahl frá Svíþjóð lék betur, á 64 höggum. Hlynur lék á 81 höggi á þriðjudag en er nú á tveimur yfir pari og fór úr 48. sæti upp í jafnt 21. sæti.

Dagbjartur Sigurbrandsson úr GR lék á 69 höggum, þremur undir pari, og er einn í 7. sæti á samtals fjórum undir pari. Lilliedahl og landi hans David Nyfjäll eru efstir á sjö undir pari. Jonas Lykke Petersen frá Danmörku, sem var efstur eftir fyrsta hring, lék annan hringinn á 77 höggum og er á einu yfir pari.

Lokahringurinn á Visby Golfklubb er leikinn á fimmtudag.