Fyrsta skóflustungan tekin að nýjum golfskála Keilis

Fyrsta skóflustungan að stækkun golfskála Golfklúbbsins Keilis á Hvaleyrarvelli í Hafnarfirði var tekin 30. september. Það gerðu Ólafur Þór Ágústsson framkvæmdastjóri, Guðmundur Örn Óskarsson formaður og Sveinn Sigurbergsson.

Þegar núverandi golfskáli var tekinn í notkun haustið 1992 var miðað við að hann þjónaði um 750 félögum. Nú eru félagar í Keili um 2.200.

Golfverslun og þjónusta færast á neðri hæðina og efri hæðin verður að mestu nýtt fyrir veitingar og félagsstarf. Sunnan við skálann rís ný geymsla fyrir golfbúnað og útisvæði verða stækkuð. Gert er ráð fyrir að framkvæmdirnar taki um tvö ár. Verksamningur var undirritaður strax að athöfninni lokinni.