Mitchell og Bridgeman jafnir á toppnum í Yokohama

Jacob Bridgeman, sem var efstur eftir fyrsta hring á 63 höggum, lék á 68 höggum á Yokohama Country Club á föstudag. Keith Mitchell lék á 65 höggum, sex undir pari, og náði honum á 11 höggum undir pari.

Mitchell er 34 ára og hefur unnið eitt mót á PGA-mótaröðinni, Honda Classic árið 2019. Hann hefur ekki sigrað á þessu tímabili en hefur þrívegis verið meðal tíu efstu. Bridgeman hefur hins vegar unnið tvö mót á árinu.

Besta hring dagsins átti Ben Kohles, sem lék á 62 höggum, níu undir pari, og fór upp í 3. sæti. Kohles var í 19. sæti stigalista Korn Ferry-mótaraðarinnar en leikur í Japan í stað þess að vera með á lokamótinu í Virginíu. Samkvæmt útreikningum PGA-mótaraðarinnar fellur hann niður í 23. sæti listans ef staðan helst, en tuttugu efstu menn fá kort á PGA-mótaröðina.

Max Homa, Zach Bauchou og Mac Meissner eru einnig á níu höggum undir pari. Bauchou lék á 64 höggum. Justin Thomas, Stephan Jaeger og Min Woo Lee eru jafnir í 7. sæti á átta undir pari og Adam Scott er á sex undir.

Titilhafinn Xander Schauffele lék á 69 höggum og er átta höggum á eftir efstu mönnum. Jordan Spieth lék á 66 höggum og er á fjórum undir pari en Collin Morikawa lék á 73 höggum og er á tveimur undir.

Ekki er skorið niður á mótinu og þriðji hringur byrjar seint í kvöld að íslenskum tíma.