Smotherman vann loksins á PGA-mótaröðinni – í hundraðasta mótinu

Austin Smotherman, sem er 32 ára, lék Black Desert-völlinn í Ivins í Utah á 63, 62, 65 og 68 höggum og lauk keppni sunnudaginn 4. október á samtals 258 höggum, 26 höggum undir pari. Það er nýtt mótsmet, en mótið var nú haldið í þriðja sinn. Doug Ghim, sem einnig bíður eftir fyrsta sigrinum, varð annar á 24 höggum undir pari og Trace Crowe og David Ford urðu jafnir í þriðja sæti, 23 höggum undir pari.

Smotherman hafði forystu fyrir lokadaginn og fékk fugl á 5. holu eftir um ellefu metra pútt. Þá var forskotið þrjú högg.

Á 13. holu var innáhöggið of stutt og stakkst niður við glompubrún. Hann náði aðeins að koma boltanum í betri legu í glompunni, sló þaðan um þrjá metra frá holu en missti púttið og fékk skramb. Í hollinu á undan setti Trace Crowe niður um tólf metra arnarpútt á 14. holu og þá munaði aðeins einu höggi.

Upphafshögg Smothermans á 14. holu, stuttri par-4-holu, lenti rétt framan við flötina og rúllaði upp í um tvo metra frá holu. Arnarpúttið fór ekki niður en fuglinn dugði til að ná tveggja högga forskoti á ný. Hann fékk annan fugl á 16. holu og skolli og fugl á tveimur síðustu holunum breyttu engu.

„Við unnum á PGA-mótaröðinni. Það er ótrúlegt,“ sagði hann eftir hringinn, í lauslegri þýðingu.

Smotherman er níundi kylfingurinn sem vinnur sitt fyrsta mót á PGA-mótaröðinni á þessu tímabili. Hann hefur verið tíu ár í atvinnumennsku og lék í tvö ár á PGA Tour Latinoamerica og í rúm tvö ár á Korn Ferry-mótaröðinni áður en hann komst inn á PGA-mótaröðina.

Hann fær 1.080.000 dollara af sex milljóna dollara verðlaunafé og 500 stig. Hann var í 79. sæti stigalistans fyrir mótið, en þeir 100 efstu halda fullum keppnisrétti fyrir 2027. Nú er hann í 51. sæti og hefur auk þess tryggt sér tveggja ára keppnisrétt.

Haldi hann sér meðal 60 efstu í haustmótunum fær hann sæti í tveimur af stærstu mótum næsta árs, á Pebble Beach og Riviera, þar sem verðlaunaféð er 20 milljónir dollara.