Jeeno Thitikul vann á Havaí – fjórði sigurinn á árinu

Thitikul lék lokahringinn á Hoakalei-vellinum á Oahu á sunnudag á 68 höggum, fjórum undir pari, og fór hringina fjóra á 267 höggum. Ina Yoon frá Suður-Kóreu, sem lék með henni í ráshóp, varð önnur á 18 undir pari, Miyu Yamashita frá Japan þriðja á 17 undir pari og Auston Kim frá Bandaríkjunum fjórða á 16 undir pari.

Hvasst var á lokadeginum. Thitikul sló upphafshöggið í vatn á 16. holu, sem er par 4, fékk skramb og glataði tveggja högga forskoti sínu. Á 17. holu setti hún niður um sex metra pútt fyrir fugli en Yoon sló í vatn af teig og fékk skolla. Þar með var Thitikul aftur tveimur höggum á undan og fugl á 18. holu, sem er par 5, innsiglaði sigurinn.

Þetta var ellefti sigur Thitikul á LPGA-mótaröðinni. Hún er önnur á heimslistanum, á eftir Nelly Korda, sem hefur einnig unnið fjögur mót á tímabilinu. Hana vantar einn sigur til að jafna Ariyu Jutanugarn, sigursælasta taílenska kylfinginn í sögu mótaraðarinnar. Samkvæmt Golf Channel er Thitikul, sem er 23 ára, jafnframt komin í fimmta sæti yfir tekjuhæstu kylfinga mótaraðarinnar frá upphafi.

Fram undan eru fjögur mót í Asíu og hefst sú törn á Buick LPGA Shanghai í Kína dagana 15.–18. október.