Veggjalistaverk vígt á Vatnahverfisvelli við Blönduós

Golfklúbburinn Ós á Blönduósi vígði í september nýtt veggjalistaverk á Vatnahverfisvelli. Listakonan Inese Elferte málaði í sumar stórt verk á vegg vélageymslu klúbbsins. Börn í Sumarfjöri Húnabyggðar skreyttu níu hurðir á gömlu fjárhúsunum við völlinn. Einnig voru hús á vellinum máluð, bæði veggir og þök.

Verkefnið, Veggjalist í Vatnahverfi, hlaut styrk úr Uppbyggingarsjóði Norðurlands vestra, en félagar í klúbbnum unnu mikið í sjálfboðavinnu.

Verkið var vígt samhliða sameiginlegu lokamóti Golfklúbbsins Óss og golfklúbbsins á Skagaströnd, sem leikið er á völlum beggja. Við vígsluna voru flutt ávörp og boðið upp á veitingar.

Vatnahverfisvöllur er skammt frá þjóðvegi 1 og klúbburinn býður kylfinga velkomna að koma við, leika hring og skoða verkið.