Golfið skilar samfélaginu rúmum 31 milljarði króna á ári

Samfélagslegt virði golfíþróttarinnar á Íslandi er metið á 31,22 milljarða króna á ári. Þetta er niðurstaða nýrrar greiningar sem Golfsamband Íslands (GSÍ) vann ásamt KPMG og finnska íþróttavísindafélaginu (Finnish Society of Sport Sciences).

Í greiningunni var beitt SROI-aðferð (e. Social Return on Investment), sem metur í krónum hvaða áhrif tiltekin starfsemi hefur á heilsu, vellíðan og félagslega þátttöku fólks. Um 15,7 milljörðum króna er varið til golfíþróttarinnar á ári hverju og hún skilar samfélaginu um 31,2 milljörðum á móti, nær tvöfaldri þeirri upphæð.

„Samfélagslegt virði golfíþróttarinnar á Íslandi er upp á rúman 31 milljarð,“ sagði Hulda Bjarnadóttir, forseti GSÍ, í viðtali við RÚV.

Áætlað er að golfiðkun spari ríkinu um fjóra milljarða króna í heilbrigðiskostnaði. Kylfingar 19 ára og eldri hreyfðu sig að meðaltali í 310 mínútur á viku við golfiðkun frá maí til ágúst 2025, en fullorðnum er ráðlagt að hreyfa sig í 150–300 mínútur á viku. Að sögn GSÍ helst þátttakan í golfi sterk með hækkandi aldri.