Haraldur Franklín einu höggi frá niðurskurðinum í Abu Dhabi

Haraldur Franklín Magnús komst ekki í gegnum niðurskurðinn á Abu Dhabi Challenge á Al Ain-vellinum í Sameinuðu arabísku furstadæmunum. Hann var samtals einu höggi undir pari eftir tvo hringi en niðurskurðurinn var við tvö undir. Á fyrri hringnum, sem hann lék á 71 höggi, einu yfir pari, fékk hann fjóra fugla og fimm skolla, en seinni hringinn lék hann á 68 höggum.

Abu Dhabi Challenge var síðasta mót HotelPlanner-mótaraðarinnar áður en lokaspretturinn hefst með tveimur mótum í Kína og lokamóti á Mallorca. Í Kína keppa þeir 68 kylfingar sem standa efst á stigalista mótaraðarinnar.

Haraldur lék á 17 mótum á tímabilinu fyrir Abu Dhabi Challenge og komst áfram á átta. Hann náði lengst á German Challenge í júlí, þar sem hann varð jafn í 25. sæti á níu höggum undir pari. Mótið í Abu Dhabi var hans síðasta á tímabilinu.