Golf leikið á ný á Djúpavogi – fyrstu fjórar brautirnar opnaðar

Brautirnar sem voru opnaðar nú í haust eru 1., 2., 8. og 9. braut, samkvæmt Kylfingi, og á hverri þeirra eru tveir teigar, gulur og rauður.

Djúpavogsbúar léku áður golf á níu holu velli á Hamri í Hamarsfirði, frá um 1991 til 2010. Þegar gamli völlurinn var skoðaður reyndist hann að mestu ónýtur og því var ákveðið að byrja upp á nýtt á Bragðavöllum.

Austurfrétt greindi frá áformunum í apríl. Þar kom fram að hópur áhugamanna, meðal annars Óskar Ragnarsson, stæði að endurvakningu klúbbsins og að Óskar teldi að minnst 20 manns í nágrenninu gætu leikið reglulega. Á Bragðavöllum er rekin ferðaþjónusta og aðstandendur telja að það styrki rekstur vallarins.

Ekki liggur fyrir hvenær völlurinn verður fullbyggður, en vonast er til að fleiri brautir verði opnaðar næsta sumar. Að sögn aðstandenda ræðst framhaldið meðal annars af því hvernig gengur að safna fé fyrir tækjum og búnaði.