Nýjar glompur og breiðari 16. braut á Old Course

Old Course á St Andrews hefur tekið breytingum í aðdraganda 155. Opna breska meistaramótsins, sem fer fram á vellinum árið 2027. Vallarhönnuðurinn Martin Ebert vann breytingarnar í samstarfi við St Andrews Links Trust og The R&A.

• Sextánda brautin hefur verið breikkuð til vinstri við Principal’s Nose- og Deacon Sime-glompurnar og þar með hefur gömul leikleið verið endurheimt. Tveimur glompum hefur verið bætt við vinstra megin á breikkuðu brautinni.
• Tvær glompur hægra megin á 2. braut hafa verið færðar lengra frá teig og nær miðju brautarinnar.
• Nýjum glompum hefur verið bætt við á 6. og 10. braut, þar sem lengstu upphafshöggin lenda.
• Glompurnar hægra megin á 9. braut, sem verja innáhöggið, hafa verið lengdar örlítið inn að leiklínunni.
• Nýir keppnisteigar lengja völlinn um 132 jarda, í 7.445 jarda.

Kylfingar á Alfred Dunhill Links Championship, sem leikið er á St Andrews, Carnoustie og Kingsbarns í vikunni, verða fyrstir til að leika breyttan völlinn í keppni.