Vinahópurinn Good Good byggði upp golfveldi á YouTube

Fyrsta myndbandið í nýjustu þáttaröð Good Good kom út 28. september og hefur fengið meira en 1,5 milljónir áhorfa. Hópurinn leikur golf í hverju ríki Bandaríkjanna og nýtt myndband kemur út á hverjum degi. Ferðin hófst í Alaska og á tíunda degi var hópurinn kominn til Nebraska.

Good Good er vinahópur sem tekur upp holukeppni, liðakeppni og áskoranir á golfvellinum, með meira gríni en tæknilegum útskýringum.

Úr vinahópi í fyrirtæki

Rætur hópsins ná aftur til áranna upp úr 2010, þegar Garrett Clark, Stephen Castaneda, Matt Scharff og Micah Morris léku mikið golf saman. Clark byrjaði að taka upp hringina og hélt úti rásinni GM Golf ásamt Morris, frænda sínum. Árið 2020, skömmu eftir að heimsfaraldurinn skall á, fékk hann vinina til að stofna Good Good. Frægasta atvik fyrstu áranna varð í júlí 2021, þegar Scharff fór holu í höggi á par-4-holu.

Með tímanum bættust betri kylfingar í hópinn. Brad Dalke varð annar á bandaríska áhugamannameistaramótinu 2016 og lék á Masters-mótinu árið eftir. Sean Walsh lék með golfliði Gonzaga-háskóla og síðar sem atvinnumaður á PGA-mótaröðunum í Kanada og Rómönsku Ameríku.

Good Good selur eigin golffatnað, hefur styrkt atvinnukylfinga á borð við Joel Dahmen og Beau Hossler og haldið sjónvarpsmót í samstarfi við NBC og Golf Channel. Árið 2025 sótti fyrirtækið í fyrsta sinn fé til utanaðkomandi fjárfesta, alls 45 milljónir dala. Meðal þeirra var framleiðslufyrirtæki Peytons Mannings. Sama ár varð til systurrásin Good Good Girls.

Dræverauglýsingin

Hinn 20. ágúst birti Good Good myndband til að kynna nýjan dræver sem Callaway seldi undir merkjum beggja. Þar hrindir Clark samstarfskonu sinni, Alexis Miestowski, í jörðina þegar hún teygir sig eftir drævernum. Myndbandið var fjarlægt samdægurs en fór víða á samfélagsmiðlum. Það átti að vera skopstæling en var gagnrýnt fyrir að sýna ofbeldi gegn konum.

Callaway viðurkenndi að hafa samþykkt myndbandið fyrir birtingu, sleit þriggja ára samstarfi 27. ágúst og hét einni milljón dala til samtaka sem berjast gegn ofbeldi á konum. Good Good lét af hlutverki aðalstyrktaraðila móts á PGA-mótaröðinni í Austin í Texas, sem verður leikið 12.–15. nóvember undir nafninu Austin Championship. Golf Channel hætti við nýja þáttaröð Big Break með Good Good og stórar verslanir á borð við Dick’s Sporting Goods og Target tóku fatnað hópsins úr hillum.

Clark baðst afsökunar í átta mínútna myndbandi og kallaði myndbandið, í lauslegri þýðingu, verstu auglýsingu sem um getur. Hann starfar áfram hjá fyrirtækinu. Hinn 2. september hættu hins vegar forstjórinn Matt Kendrick og Joe Flannery, forseti fyrirtækisins. Nahid Giga, einn fyrstu fjárfestanna og stjórnarmaður, tók tímabundið við starfi forstjóra.

50 ríki á 50 dögum

Ferðin um Bandaríkin er fyrsta stóra verkefni hópsins eftir hneykslið. Hvert ríki fær einkunn á kvarðanum 0–100 og af fyrstu átta er Alaska efst með 90,5. Fatnaðurinn sem ætlaður var mótinu í Austin er nú seldur í nafni ferðarinnar, beint á vef fyrirtækisins.

Standist áætlunin lýkur ferðinni um miðjan nóvember, á svipuðum tíma og mótið í Austin fer fram án nafns Good Good.