Reed snýr aftur eftir meiðsli og vill auka forskotið á McIlroy

Reed hætti leik á öðrum degi BMW PGA-meistaramótsins á Wentworth og hefur ekki lokið hring í keppni síðan. Í fyrstu var óttast að hann hefði brotið bein í hendi. Hann flaug heim til Bandaríkjanna morguninn eftir og þar kom í ljós að höndin var heil en meinið sat í öxlinni, að sögn mótaraðarinnar. Hann dró sig því úr Alfred Dunhill Links-mótinu í Skotlandi. Reed segist aldrei fyrr hafa hætt í miðjum hring vegna meiðsla. „Ég hefði frekar viljað leika á milljón höggum en að hætta,“ sagði hann, í lauslegri þýðingu.

Rory McIlroy varð annar á Wentworth og minnkaði bilið á milli þeirra um meira en helming. Samkvæmt The National munaði enn um 300 stigum á þeim um mánaðamótin. Reed hefur verið efstur á stigalistanum síðan í febrúar. Hann vann Hero Dubai Desert Classic og Qatar Masters og tapaði í bráðabana á mótinu í Barein á milli sigranna. Í 18 mótum á tímabilinu hefur hann auk þess þrisvar endað meðal tíu efstu, þar á meðal í öðru sæti á Opna írska í september. Haldi hann forystunni verður hann annar Bandaríkjamaðurinn til að vinna Race to Dubai, á eftir Collin Morikawa árið 2021.

Reed er 36 ára og vann Masters-mótið 2018. Hann endurnýjaði ekki samning sinn við LIV Golf fyrir þetta ár heldur stefndi á að vinna sér aftur sæti á PGA-mótaröðinni í gegnum Evrópu. Tíu efstu menn stigalistans sem ekki hafa þegar keppnisrétt vestanhafs fá kort fyrir árið 2027.

Í samtali við Golf Channel sagði Reed að hann hefði tryggt sér endurkomuna með byrjun tímabilsins. Hann telur að aðrir kylfingar LIV eigi að fara sömu leið og vinna sér inn sætið með árangri en ekki fá það gefið.

Í Madríd á Marco Penge titil að verja og meðal keppenda eru risamótsmeistararnir Justin Rose, Shane Lowry, Francesco Molinari, Danny Willett, Sergio García og Bubba Watson. Sigurvegarinn fær boð á Masters-mótið og sá sem efstur verður þeirra sem ekki hafa þegar tryggt sér sæti á Opna breska fær keppnisrétt þar.

Strax í næstu viku leikur Reed á DP World India Championship, ásamt McIlroy, Eugenio Chacarra og Casey Jarvis, sem einnig eiga möguleika á titlinum. Tímabilinu lýkur með úrslitakeppninni í Abu Dhabi og Dubai, þar sem DP World Tour Championship fer fram 12.–15. nóvember.