Claire Dowling fyrsta konan sem verður fyrirliði Royal and Ancient-klúbbsins

Fallbyssuskot rauf morgunkyrrðina á St Andrews í Skotlandi föstudaginn 25. september þegar Claire Dowling sló upphafshögg sitt á fyrsta teig Old Course. Þar með tók hún formlega við sem fyrirliði klúbbsins.

Athöfnin, sem á ensku kallast „driving in“, er gömul hefð í klúbbnum. Nýr fyrirliði slær eitt högg af fyrsta teig á meðan kylfusveinar bíða úti á brautinni og keppast um að ná boltanum. Í þetta sinn náði kylfusveinninn Dillon McCarron honum og hlaut að launum gullpening úr hendi Dowling.

Dowling er fædd og uppalin í Dublin. Á keppnisferlinum vann hún fimm írsk meistaramót auk breska höggleiksmeistaramóts kvenna í flokki áhugakylfinga. Hún var fyrirliði sameiginlegs liðs Bretlands og Írlands í Curtis-bikarnum árið 2000, þegar liðið tapaði 10–8 fyrir Bandaríkjunum á Ganton-vellinum á Englandi. Hún var í hópi fyrstu kvennanna sem fengu aðild að klúbbnum árið 2015, er reyndur dómari, heiðursfélagi í írska kvennagolfsambandinu og enn með 7,6 í forgjöf.

The Royal and Ancient Golf Club of St Andrews var stofnaður árið 1754 og er einn elsti golfklúbbur heims. Fyrirliðinn er valinn til eins árs í senn og gegnir fyrst og fremst heiðurs- og fulltrúahlutverki. Klúbburinn er ekki það sama og The R&A, sem setur golfreglurnar ásamt bandaríska golfsambandinu og heldur Opna breska meistaramótið.